jazba-e-shauq kisi rang mein pinhan na hua

jazba-e-shauq kisī rang meñ pinhāñ na huā

sho.ala-e-ishq charāġh-e-tah-e-dāmāñ na huā

kitnā ḳhuddār thā sharminda-e-ehsāñ na huā

aah vo dard jo minnat-kash-e-darmāñ na huā

yuuñ to kyā kuchh na huā aadmī insāñ na huā

kisī sūrat kisī pahlū kisī unvāñ na huā

zarra zarra hī rahā mehr-e-daraḳhshāñ na huā

qatra qatra hī rahā mauja-e-tūfāñ na huā

kabhī mil baiThte aapas meñ ye imkāñ na huā

tujh se itnā bhī are gardish-e-daurāñ na huā

ishq se husn kī rusvā.ī kā sāmāñ na huā

jazba-e-dil kisī sūrat se numāyāñ na huā

paas thā husn kī ismat kā vafādāroñ ko

josh-e-vahshat meñ kabhī chāk-garebāñ na huā

yuuñ to khilne ko khile phuul bahāroñ meñ bahut

ġhuncha-e-dil mirā lekin gul-e-ḳhandāñ na huā

inheñ aapas meñ bahar-taur na Takrānā thā

mus.haf-e-ruḳh ke muqābil kabhī qur.āñ na huā

log duniyā ko danī kahte haiñ sach kahte haiñ

maiñ zamāne kī ravish par kabhī hairāñ na huā

vaqt badlā to zamāne ne nigāheñ pherīñ

kasmapursī ke sivā koī bhī pursāñ na huā

mere har haal meñ shāmil rahī rahmat terī

maiñ kisī haal meñ māyūs-o-pareshāñ na huā

ma.arifat us ko ḳhudā kī bhalā kaise hogī

apnī hī zaat kā jis shaḳhs ko irfāñ na huā

ab bhī maujūd haiñ asnām-e-ḳhayālī dil meñ

ka.aba-e-dil kabhī bhūle se musalmāñ na huā

kyā navāzegī use bhī tirī rahmat yā rab

jo kabhī apne gunāhoñ pe pashemāñ na huā

pī liye aañkh meñ aa.e hue aañsū 'tālib'

jazba-e-ishq mirā jazba-e-arzāñ na huā

jazba-e-shauq kisi rang mein pinhan na hua

shoala-e-ishq charagh-e-tah-e-daman na hua

kitna KHuddar tha sharminda-e-ehsan na hua

aah wo dard jo minnat-kash-e-darman na hua

yun to kya kuchh na hua aadmi insan na hua

kisi surat kisi pahlu kisi unwan na hua

zarra zarra hi raha mehr-e-daraKHshan na hua

qatra qatra hi raha mauja-e-tufan na hua

kabhi mil baiThte aapas mein ye imkan na hua

tujh se itna bhi are gardish-e-dauran na hua

ishq se husn ki ruswai ka saman na hua

jazba-e-dil kisi surat se numayan na hua

pas tha husn ki ismat ka wafadaron ko

josh-e-wahshat mein kabhi chaak-gareban na hua

yun to khilne ko khile phul bahaaron mein bahut

ghuncha-e-dil mera lekin gul-e-KHandan na hua

inhen aapas mein bahar-taur na Takrana tha

mushaf-e-ruKH ke muqabil kabhi quran na hua

log duniya ko dani kahte hain sach kahte hain

main zamane ki rawish par kabhi hairan na hua

waqt badla to zamane ne nigahen pherin

kasmapursi ke siwa koi bhi pursan na hua

mere har haal mein shamil rahi rahmat teri

main kisi haal mein mayus-o-pareshan na hua

marifat us ko KHuda ki bhala kaise hogi

apni hi zat ka jis shaKHs ko irfan na hua

ab bhi maujud hain asnam-e-KHayali dil mein

kaba-e-dil kabhi bhule se musalman na hua

kya nawazegi use bhi teri rahmat ya rab

jo kabhi apne gunahon pe pasheman na hua

pi liye aankh mein aae hue aansu 'talib'

jazba-e-ishq mera jazba-e-arzan na hua