jazba-e-shauq mera kuchh to baDhate jate

jazba-e-shauq mirā kuchh to baḌhāte jaate

chand bāteñ hī dilāse kī sunāte jaate

taqviyat kuchh to mohabbat ko mirī mil jaatī

kuchh to chāhat-bharā andāz dikhāte jaate

maiñ bhī hoñToñ pe yahāñ pyaas liye baiThā huuñ

koī paimāna mohabbat kā baḌhāte jaate

lazzat-e-ishq kā ehsās tumheñ bhī hotā

karb-e-tanhā.ī meñ jab ashk bahāte jaate

ġham kī tārīkī se chhuTkāre kī sūrat bantī

shādmānī kā diyā dil meñ jalāte jaate

maiñ akelā hī nahīñ aur bhī haiñ merī tarah

us ke kūche meñ nazar ā.eñge āte-jāte

bach ga.e ishq ke āzār se 'ajmal' varna

tum lahū dil kā shab-e-vasl jalāte jaate

jazba-e-shauq mera kuchh to baDhate jate

chand baaten hi dilase ki sunate jate

taqwiyat kuchh to mohabbat ko meri mil jati

kuchh to chahat-bhara andaz dikhate jate

main bhi honTon pe yahan pyas liye baiTha hun

koi paimana mohabbat ka baDhate jate

lazzat-e-ishq ka ehsas tumhein bhi hota

karb-e-tanhai mein jab ashk bahate jate

gham ki tariki se chhuTkare ki surat banti

shadmani ka diya dil mein jalate jate

main akela hi nahin aur bhi hain meri tarah

us ke kuche mein nazar aaenge aate-jate

bach gae ishq ke aazar se 'ajmal' warna

tum lahu dil ka shab-e-wasl jalate jate