jazbaat mein Dubi hui ye raat hai kuchh aur

jazbāt meñ Duubī huī ye raat hai kuchh aur

be-tāb nigāhoñ kī mulāqāt hai kuchh aur

dīvānoñ ke sar par hai tirā reshmī saaya

ai zulf-e-siyah-fām tirī baat hai kuchh aur

tū mai se bharā jaam baḌhātā hai sabhī ko

saaqī tirā andāz-e-musāvāt hai kuchh aur

har uzv-e-badan se vo kiran phuuT rahī hai

sharmā.e qamar bhī ki tirī zaat hai kuchh aur

pardes tujhe chhoḌ ke jaatā na kabhī maiñ

ai jān-e-vafā sūrat-e-hālāt hai kuchh aur

khulte haiñ yahāñ raaz abad aur azal ke

nazroñ meñ mirī bazm-e-ḳhurāfāt hai kuchh aur

maanā ki sar-e-bazm vo karte haiñ taġhāful

chehre pe magar shoḳhi-e-jazbāt hai kuchh aur

bas harf-e-duā kahte haiñ hotī nahīñ maqbūl

jo qalb se nikle vo munājāt hai kuchh aur

rakkhūñgā salīqe se nihāñ-ḳhāna-e-dil meñ

mere liye zaḳhmoñ kī ye sauġhāt hai kuchh aur

sāvan ko bhī dekhā hai baraste hue ai 'shād'

āñkhoñ se jo hotī hai vo barsāt hai kuchh aur

jazbaat mein Dubi hui ye raat hai kuchh aur

be-tab nigahon ki mulaqat hai kuchh aur

diwanon ke sar par hai tera reshmi saya

ai zulf-e-siyah-fam teri baat hai kuchh aur

tu mai se bhara jam baDhata hai sabhi ko

saqi tera andaz-e-musawat hai kuchh aur

har uzw-e-badan se wo kiran phuT rahi hai

sharmae qamar bhi ki teri zat hai kuchh aur

pardes tujhe chhoD ke jata na kabhi main

ai jaan-e-wafa surat-e-haalat hai kuchh aur

khulte hain yahan raaz abad aur azal ke

nazron mein meri bazm-e-KHurafat hai kuchh aur

mana ki sar-e-bazm wo karte hain taghaful

chehre pe magar shoKHi-e-jazbaat hai kuchh aur

bas harf-e-dua kahte hain hoti nahin maqbul

jo qalb se nikle wo munajat hai kuchh aur

rakkhunga saliqe se nihan-KHana-e-dil mein

mere liye zaKHmon ki ye saughat hai kuchh aur

sawan ko bhi dekha hai baraste hue ai 'shad'

aankhon se jo hoti hai wo barsat hai kuchh aur