jhapkī zarā jo aañkh javānī guzar ga.ī
badlī kī chhāñv thī idhar aa.ī udhar ga.ī
mashshāta-e-bahār ajab gul katar ga.ī
muñh-band jo kalī thī khilī aur sañvar ga.ī
pesh-e-jamāl-e-yār kiran āftāb kī
sharmā ke chāhtī thī ki palTe bikhar ga.ī
mal ke bhabhūt chehre pe tāroñ kī chhāñv kā
dhonī ramā.e dar pe ye kis ke sahar ga.ī
kyā jaane aañkh maar ke kyā kah ga.ī shafaq
phūloñ kī god mauj-e-nasīm aa ke bhar ga.ī
siine meñ aur taab de shole ko shauq ke
sajda ġhalat agar na tajallī nikhar ga.ī
terī hī jalva-zār hai duniyā-e-rañg-o-bū
ai vaa.e vo nazar jo hijābāt par ga.ī
ab haath malte haiñ ki dam-e-arz-e-mājrā
kahne kī baat dhyān se kaisī utar ga.ī
kuchh din kī aur kashmakash-e-zīst hai 'asar'
achchhī burī guzarnī thī jaisī guzar ga.ī
jhapki zara jo aankh jawani guzar gai
badli ki chhanw thi idhar aai udhar gai
mashshata-e-bahaar ajab gul katar gai
munh-band jo kali thi khili aur sanwar gai
pesh-e-jamal-e-yar kiran aaftab ki
sharma ke chahti thi ki palTe bikhar gai
mal ke bhabhut chehre pe taron ki chhanw ka
dhoni ramae dar pe ye kis ke sahar gai
kya jaane aankh mar ke kya kah gai shafaq
phulon ki god mauj-e-nasim aa ke bhar gai
sine mein aur tab de shole ko shauq ke
sajda ghalat agar na tajalli nikhar gai
teri hi jalwa-zar hai duniya-e-rang-o-bu
ai wae wo nazar jo hijabaat par gai
ab hath malte hain ki dam-e-arz-e-majra
kahne ki baat dhyan se kaisi utar gai
kuchh din ki aur kashmakash-e-zist hai 'asar'
achchhi buri guzarni thi jaisi guzar gai
Source:
Range-e-Gazal (Pg. 444)
-
Author:
shahzaad ahmad
-
- Edition: 1988
- Publisher: Ali Printers, 19-A Abate Road, Lahore
- Year of Publication: 1988
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.