jhonka nafas ka mauja-e-sarsar laga mujhe

jhoñkā nafas kā mauja-e-sarsar lagā mujhe

raat aa ga.ī to ḳhud se baḌā Dar lagā mujhe

itnā gudāz hai mirā dil fart-e-dard se

pheñkā kisī ne phuul to patthar lagā mujhe

ḳhud hī ubhar ke Duub gayā apnī zaat meñ

sūraj ik iztirāb kā paikar lagā mujhe

ye shām-e-va.ada hai ki paḌāv hai vaqt kā

ik lamha ik sadī ke barābar lagā mujhe

jaise maiñ terī zaat kā aks-e-jamīl huuñ

yuuñ bhī tire firāq meñ aksar lagā mujhe

is shor meñ muhāl thā terā ḳhayāl bhī

sahrā bhī tere shahr se behtar lagā mujhe

dāman se dho rahā thā maiñ dhabbe gunāh ke

qatra bhī āñsuoñ kā samundar lagā mujhe

taaza havā meñ sukh kā koī saañs le sakūñ

ai rabb-e-kā.ināt zarā par lagā mujhe

jhonka nafas ka mauja-e-sarsar laga mujhe

raat aa gai to KHud se baDa Dar laga mujhe

itna gudaz hai mera dil fart-e-dard se

phenka kisi ne phul to patthar laga mujhe

KHud hi ubhar ke Dub gaya apni zat mein

suraj ek iztirab ka paikar laga mujhe

ye sham-e-wada hai ki paDaw hai waqt ka

ek lamha ek sadi ke barabar laga mujhe

jaise main teri zat ka aks-e-jamil hun

yun bhi tere firaq mein aksar laga mujhe

is shor mein muhaal tha tera KHayal bhi

sahra bhi tere shahr se behtar laga mujhe

daman se dho raha tha main dhabbe gunah ke

qatra bhi aansuon ka samundar laga mujhe

taza hawa mein sukh ka koi sans le sakun

ai rabb-e-kainat zara par laga mujhe