jhuke sajde mein hum aflak par uTh kar nikal aae

jhuke sajde meñ ham aflāk par uTh kar nikal aa.e

baḌī gahrā.ī meñ jā kar bahut uupar nikal aa.e

irāda thā zarā sī der āñkheñ band karne kā

magar manzar ke andar se ka.ī manzar nikal aa.e

baḌī muddat rahe dīvār par sākit ka.ī paikar

achānak ek din tasvīr se bāhar nikal aa.e

sitamgarān-shahr-e-shar yahāñ aisā na ho ik din

shikasta jism ke kāñdhoñ pe bāġhī sar nikal aa.e

batā.eñ kis tarah tanqīd meñ insāf barteñge

agar ham aap ke me'yār se behtar nikal aa.e

tum uḌne lag ga.e ho phir ga.ī guzrī fazāoñ meñ

tumhāre jism par shāyad purāne par nikal aa.e

vahāñ kyā guftugū kyā bahs kā me'yār honā hai

zarā sī baat par 'āsim' jahāñ ḳhanjar nikal aa.e

jhuke sajde mein hum aflak par uTh kar nikal aae

baDi gahrai mein ja kar bahut upar nikal aae

irada tha zara si der aankhen band karne ka

magar manzar ke andar se kai manzar nikal aae

baDi muddat rahe diwar par sakit kai paikar

achanak ek din taswir se bahar nikal aae

sitamgaran-shahr-e-shar yahan aisa na ho ek din

shikasta jism ke kandhon pe baghi sar nikal aae

bataen kis tarah tanqid mein insaf bartenge

agar hum aap ke me'yar se behtar nikal aae

tum uDne lag gae ho phir gai guzri fazaon mein

tumhaare jism par shayad purane par nikal aae

wahan kya guftugu kya bahs ka me'yar hona hai

zara si baat par 'asim' jahan KHanjar nikal aae