jhuT sach aap to ilzam diye jate hain

jhuuT sach aap to ilzām diye jaate haiñ

baat sunte nahīñ dushnām diye jaate haiñ

tirchhī nazroñ se kiye us ne bahut dil zaḳhmī

tiir TeḌhe magar kaam diye jaate haiñ

kah gayā ye bhī koī ruuTh ke jaane vaalā

ham tujhe maut kā paiġhām diye jaate haiñ

pāsbān jaag uTheñ vo to unheñ de denā

likh ke kāġhaz pe ye ik naam diye jaate haiñ

aap ke lutf-o-ināyat kā yahī hai badla

ġham liye jaate haiñ ārām diye jaate haiñ

dil huā jaan huī un kī bhalā kyā qīmat

aisī chīzoñ ke kahīñ daam diye jaate haiñ

tīr-e-qātil ko kaleje se lagā rakkhā hai

ham to dushman ko bhī ārām diye jaate haiñ

kaam aa jā.egā dushman kī mohabbat meñ kabhī

ehtiyātan dil-e-nākām diye jaate haiñ

ab to khul khele vo 'beḳhud' se ḳhudā ḳhair kare

ab to ḳhud bhar ke use jaam diye jaate haiñ

jhuT sach aap to ilzam diye jate hain

baat sunte nahin dushnam diye jate hain

tirchhi nazron se kiye us ne bahut dil zaKHmi

tir TeDhe magar kaam diye jate hain

kah gaya ye bhi koi ruTh ke jaane wala

hum tujhe maut ka paigham diye jate hain

pasban jag uThen wo to unhen de dena

likh ke kaghaz pe ye ek nam diye jate hain

aap ke lutf-o-inayat ka yahi hai badla

gham liye jate hain aaram diye jate hain

dil hua jaan hui un ki bhala kya qimat

aisi chizon ke kahin dam diye jate hain

tir-e-qatil ko kaleje se laga rakkha hai

hum to dushman ko bhi aaram diye jate hain

kaam aa jaega dushman ki mohabbat mein kabhi

ehtiyatan dil-e-nakaam diye jate hain

ab to khul khele wo 'beKHud' se KHuda KHair kare

ab to KHud bhar ke use jam diye jate hain