jidhar bhi dekhiye har su hamein aghyar milte hain

jidhar bhī dekhiye har sū hameñ aġhyār milte haiñ

jahāñ par ham qadam rakkheñ vahīñ par ḳhaar milte haiñ

sunā.ūñ mājrā-e-ġham kise is ġham ke aalam meñ

ki is nagrī ke baasī jaan se bezār milte haiñ

hazāroñ saath dete haiñ ḳhushī ke vaqt meñ paiham

ki jab qismat bigaḌtī hai kahāñ phir yaar milte haiñ

ḳhizāñ ne kar diyā pāmāl yā-rab gulshan-e-hastī

ki har jānib hameñ ujḌe hue gulzār milte haiñ

na ghabrā ai dil-e-muztar ye dastūr-e-zamāna hai

mohabbat karne vāloñ ko faqat āzār milte haiñ

nasīm-e-sub.h gulshan meñ na.e ġhunche khilātī hai

sabhī ahl-e-mohabbat ahl-e-dil sarshār milte haiñ

kabhī aisā bhī e.ajāz-e-mohabbat rañg dikhātā hai

talab kī raah meñ aksar hameñ ġham-ḳhvār milte haiñ

jidhar bhi dekhiye har su hamein aghyar milte hain

jahan par hum qadam rakkhen wahin par KHar milte hain

sunaun majra-e-gham kise is gham ke aalam mein

ki is nagri ke basi jaan se bezar milte hain

hazaron sath dete hain KHushi ke waqt mein paiham

ki jab qismat bigaDti hai kahan phir yar milte hain

KHizan ne kar diya pamal ya-rab gulshan-e-hasti

ki har jaanib hamein ujDe hue gulzar milte hain

na ghabra ai dil-e-muztar ye dastur-e-zamana hai

mohabbat karne walon ko faqat aazar milte hain

nasim-e-subh gulshan mein nae ghunche khilati hai

sabhi ahl-e-mohabbat ahl-e-dil sarshaar milte hain

kabhi aisa bhi eajaz-e-mohabbat rang dikhata hai

talab ki rah mein aksar hamein gham-KHwar milte hain