jigar ke KHun se tazin-e-baal-o-par kar di

jigar ke ḳhuun se taz.īn-e-bāl-o-par kar dī

chaman-asīr ne yuuñ zindagī basar kar dī

hikāyat-e-ġham-e-dil yuuñ bhī muḳhtasar hī thī

tumhāre kahne se lo aur muḳhtasar kar dī

mirī vafā kī kahānī se kaun vāqif thā

tumhāre jaur ne tash.hīr dar-ba-dar kar dī

qadam baḌhāo ki manzil qarīb hai shāyad

tabhī to raah harīfoñ ne tañg tar kar dī

ye kis jahān-e-tamannā kā phir ḳhayāl aayā

ki jis ḳhayāl ne har shai azīz-tar kar dī

shabān-e-zulf kī bāteñ tulūa-e-ruḳh kī ḳhair

tamām umr ibādat meñ muḳhtasar kar dī

na.e haiñ jām-o-subū bāda-o-ḳhumār nayā

aur ham ne kohna-sharābī meñ shab sahar kar dī

bahut hī ḳhuub thī rūdād-e-mausam-e-hastī

tirī nigāh ke saa.e ne ḳhūb-tar kar dī

na manziloñ kī ḳhabar hai na rāstoñ kā patā

matā-e-qalb-o-nazar nazr-e-rāh par kar dī

na.e shu.ūr na.e falsafe na.ī aqdār

ayyār-e-ishq ne har kā.enāt sar kar dī

jigar ke KHun se tazin-e-baal-o-par kar di

chaman-asir ne yun zindagi basar kar di

hikayat-e-gham-e-dil yun bhi muKHtasar hi thi

tumhaare kahne se lo aur muKHtasar kar di

meri wafa ki kahani se kaun waqif tha

tumhaare jaur ne tashhir dar-ba-dar kar di

qadam baDhao ki manzil qarib hai shayad

tabhi to rah harifon ne tang tar kar di

ye kis jahan-e-tamanna ka phir KHayal aaya

ki jis KHayal ne har shai aziz-tar kar di

shaban-e-zulf ki baaten tulua-e-ruKH ki KHair

tamam umr ibaadat mein muKHtasar kar di

nae hain jam-o-subu baada-o-KHumar naya

aur hum ne kohna-sharabi mein shab sahar kar di

bahut hi KHub thi rudad-e-mausam-e-hasti

teri nigah ke sae ne KHub-tar kar di

na manzilon ki KHabar hai na raston ka pata

mata-e-qalb-o-nazar nazr-e-rah par kar di

nae shuur nae falsafe nai aqdar

ayyar-e-ishq ne har kaenat sar kar di