jigar KHun ho ke bahar dida-e-giryan aawega

jigar ḳhuuñ ho ke bāhar dīda-e-giryān āvegā

yahī ronā rahā to āj-kal tūfān āvegā

ḳhabar aate hī pūchhe hai zālim baiTh jā yak-dam

haqīqat sab kahūñgā mujh meñ jab ausān āvegā

na hai ab ḳhāk-afshānī na hairānī na uryānī

junūñ gar aa gayā to le ke sab sāmān āvegā

paḌhūñgā pīchhe naama meñ ḳhudā ke vāste qāsid

ye kah avval ki yaañ tak vo kisī unvān āvegā

na jā ai jaan Tuk tū aur bhī ik raat is tan se

sunā hai kal ke din vo ghar mire mehmān āvegā

kisī kī qadar jīte-jī nahīñ ma.alūm hotī hai

kare hai qatl par pīchhe tujhe armān āvegā

galī meñ us but-e-ḳhūñ-ḳhvār kī 'jur.at' chalā to hai

va-lekin vaañ se ḳhuuñ meñ dekhnā afshān āvegā

jigar KHun ho ke bahar dida-e-giryan aawega

yahi rona raha to aaj-kal tufan aawega

KHabar aate hi puchhe hai zalim baiTh ja yak-dam

haqiqat sab kahunga mujh mein jab ausan aawega

na hai ab KHak-afshani na hairani na uryani

junun gar aa gaya to le ke sab saman aawega

paDhunga pichhe nama mein KHuda ke waste qasid

ye kah awwal ki yan tak wo kisi unwan aawega

na ja ai jaan Tuk tu aur bhi ek raat is tan se

suna hai kal ke din wo ghar mere mehman aawega

kisi ki qadar jite-ji nahin malum hoti hai

kare hai qatl par pichhe tujhe arman aawega

gali mein us but-e-KHun-KHwar ki 'jurat' chala to hai

wa-lekin wan se KHun mein dekhna afshan aawega