jigar ko chaak ki dil ko lahu lahu kije

jigar ko chaak ki dil ko lahū lahū kiije

hayāt ko kisī unvān surḳh-rū kiije

nahīñ hai hausla mar mar ke zinda rahne kā

to kaun kahtā hai jiine kī aarzū kiije

hai chaak chaak bahut zindagī kā pairāhan

ḳhudā ke vāste kuchh koshish-e-rafū kiije

lahū se pahle gulistāñ ko kījiye sairāb

phir us ke ba.ad tamannā-e-rañg-o-bū kiije

tumhārī bazm meñ aa.ī kahāñ se ye raunaq

nazar milā ke zarā ham se guftugū kiije

ba-faiz-e-ishq taqaddus-ma.āb haiñ ham log

hamārā zikr bhī kiije to bā-vazū kiije

qalam uThe to rahe azmat-e-qalam kā ḳhayāl

ai 'manshā' yūñhī sadā hifz-e-ābrū kiije

jigar ko chaak ki dil ko lahu lahu kije

hayat ko kisi unwan surKH-ru kije

nahin hai hausla mar mar ke zinda rahne ka

to kaun kahta hai jine ki aarzu kije

hai chaak chaak bahut zindagi ka pairahan

KHuda ke waste kuchh koshish-e-rafu kije

lahu se pahle gulistan ko kijiye sairab

phir us ke baad tamanna-e-rang-o-bu kije

tumhaari bazm mein aai kahan se ye raunaq

nazar mila ke zara hum se guftugu kije

ba-faiz-e-ishq taqaddus-maab hain hum log

hamara zikr bhi kije to ba-wazu kije

qalam uThe to rahe azmat-e-qalam ka KHayal

ai 'mansha' yunhi sada hifz-e-abru kije