jina hai agar tujhko KHugar ho tamanna ka

jiinā hai agar tujh ko ḳhūgar ho tamanna kā

andāz ḳhalīlī hai maslak hai ye muusā kā

be-āb-e-tamanna dil jazbāt se aarī hai

manzar kabhī dekhā hai sūkhe hue dariyā kā

mahbūb hai mai-kash ko rindoñ kī baġhal meñ hai

lekin ye taqarrub hai baada hī se miinā kā

thā jazb-o-kashish jis meñ vo sham.a-e-tajallī thī

zaa.er koī kyūñkar ho ab vādī-e-sīnā kā

chaḌhte hue sūraj ke tevar kabhī dekhe haiñ

āġhāz hai ā.īna anjām-e-tamannā kā

islāh kī duniyā meñ us dil kā ḳhudā-hāfiz

paidā na huā jis meñ ehsās hī tauba kā

sīkhā hai 'amīñ' maiñ ne hātif se ġhazal kahnā

ye naġhma-e-jāñ-parvar hai bulbul-e-sidra kā

jina hai agar tujh ko KHugar ho tamanna ka

andaz KHalili hai maslak hai ye musa ka

be-ab-e-tamanna dil jazbaat se aari hai

manzar kabhi dekha hai sukhe hue dariya ka

mahbub hai mai-kash ko rindon ki baghal mein hai

lekin ye taqarrub hai baada hi se mina ka

tha jazb-o-kashish jis mein wo shama-e-tajalli thi

zaer koi kyunkar ho ab wadi-e-sina ka

chaDhte hue suraj ke tewar kabhi dekhe hain

aaghaz hai aaina anjam-e-tamanna ka

islah ki duniya mein us dil ka KHuda-hafiz

paida na hua jis mein ehsas hi tauba ka

sikha hai 'amin' main ne hatif se ghazal kahna

ye naghma-e-jaan-parwar hai bulbul-e-sidra ka