jine ka ban gaya hai imkan zindagi mein

jiine kā ban gayā hai imkān zindagī meñ

tum aa ga.e hamārī vīrān zindagī meñ

har rāsta hai ab to āsān zindagī meñ

shāmil huā hai jab se qur.ān zindagī meñ

marne ke ba.ad is kī mohlat nahīñ milegī

kar āḳhirat kā pyāre sāmān zindagī meñ

phir mil sakī na us ko jā-e-panāh koī

jis ne bhī kho diye haiñ ausān zindagī meñ

ye kah ke apne dil ko dete haiñ ham tasallī

puure hue haiñ kis ke armān zindagī meñ

kuchh aise log bhī haiñ duniyā meñ terī yā-rab

lete nahīñ kisī kā ehsān zindagī meñ

aadat sī ban ga.ī hai ab to hanīf-'rāhī'

jhele haiñ jaane kitne tūfān zindagī meñ

jine ka ban gaya hai imkan zindagi mein

tum aa gae hamari viran zindagi mein

har rasta hai ab to aasan zindagi mein

shamil hua hai jab se quran zindagi mein

marne ke baad is ki mohlat nahin milegi

kar aaKHirat ka pyare saman zindagi mein

phir mil saki na us ko ja-e-panah koi

jis ne bhi kho diye hain ausan zindagi mein

ye kah ke apne dil ko dete hain hum tasalli

pure hue hain kis ke arman zindagi mein

kuchh aise log bhi hain duniya mein teri ya-rab

lete nahin kisi ka ehsan zindagi mein

aadat si ban gai hai ab to hanif-'rahi'

jhele hain jaane kitne tufan zindagi mein