jine ke agar chand sahaare bhi mile hain

jiine ke agar chand sahāre bhī mile haiñ

to jaan se jaane ke ishāre bhī mile haiñ

har chand rah-e-ishq ke ġham saḳht haiñ lekin

is raah ke kuchh ġham hameñ pyāre bhī mile haiñ

kuchh apnī vafāoñ se jo ummīd thī ham ko

kuchh un kī nigāhoñ ke sahāre bhī mile haiñ

ai rāh-rav-e-rāh-e-junūñ bhuul na jaanā

is raah meñ jī jaan se haare bhī mile haiñ

ilzām-e-taġhāful hameñ taslīm hai lekin

badle hue andāz tumhāre bhī mile haiñ

kyā kījiye tadbīr se haarā nahīñ jaatā

go raah meñ taqdīr ke maare bhī mile haiñ

tūfāñ meñ sabhī Duub to jaate nahīñ 'aḳhgar'

kuchh logoñ ko tūfāñ meñ kināre bhī mile haiñ

jine ke agar chand sahaare bhi mile hain

to jaan se jaane ke ishaare bhi mile hain

har chand rah-e-ishq ke gham saKHt hain lekin

is rah ke kuchh gham hamein pyare bhi mile hain

kuchh apni wafaon se jo ummid thi hum ko

kuchh un ki nigahon ke sahaare bhi mile hain

ai rah-raw-e-rah-e-junun bhul na jaana

is rah mein ji jaan se haare bhi mile hain

ilzam-e-taghaful hamein taslim hai lekin

badle hue andaz tumhaare bhi mile hain

kya kijiye tadbir se haara nahin jata

go rah mein taqdir ke mare bhi mile hain

tufan mein sabhi Dub to jate nahin 'aKHgar'

kuchh logon ko tufan mein kinare bhi mile hain