jine ke Dhab jab aae to marna paDa mujhe

jiine ke Dhab jab aa.e to marnā paḌā mujhe

kis ġham se ram kiyā ki Thaharnā paḌā mujhe

maiñ aur apnī jaan kā dushman nahīñ nahīñ

aisī hī vo adā thī jo marnā paḌā mujhe

kuchh ḳhud mujhe ubhār ga.ī rif.at-e-jamāl

kuchh aap pastiyoñ se ubharnā paḌā mujhe

hālāñki apne aap se maiñ duur bhī na thā

kitne hī rāstoñ se guzarnā paḌā mujhe

ġhunche kī tarah shab qafas-e-rang-o-bū rahā

mānind-e-gul sahar ko bikharnā paḌā mujhe

apne hī hāthoñ aap ko khīñchā salīb par

mātam bhī apnā aap hī karnā paḌā mujhe

phir kyā jo maiñ zamīñ se gayā tā-ba-āsmāñ

āḳhir isī zamīñ pe utarnā paḌā mujhe

kyā DhūñDte ho ab mire lab par shaguftagī

ik zaḳhm thā ki ḳhud jise bharnā paḌā mujhe

'urfī' sunāo muzhda mire ḳhair-ḳhvāh ko

bigḌā zamāna ye ki sudharnā paḌā mujhe

jine ke Dhab jab aae to marna paDa mujhe

kis gham se ram kiya ki Thaharna paDa mujhe

main aur apni jaan ka dushman nahin nahin

aisi hi wo ada thi jo marna paDa mujhe

kuchh KHud mujhe ubhaar gai rifat-e-jamal

kuchh aap pastiyon se ubharna paDa mujhe

haalanki apne aap se main dur bhi na tha

kitne hi raston se guzarna paDa mujhe

ghunche ki tarah shab qafas-e-rang-o-bu raha

manind-e-gul sahar ko bikharna paDa mujhe

apne hi hathon aap ko khincha salib par

matam bhi apna aap hi karna paDa mujhe

phir kya jo main zamin se gaya ta-ba-asman

aaKHir isi zamin pe utarna paDa mujhe

kya DhunDte ho ab mere lab par shaguftagi

ek zaKHm tha ki KHud jise bharna paDa mujhe

'urfi' sunao muzhda mere KHair-KHwah ko

bigDa zamana ye ki sudharna paDa mujhe