jiite haiñ kaise aisī misāloñ ko dekhiye
parda uThā ke chāhne vāloñ ko dekhiye
kyā dil jigar hai chāhne vāloñ ko dekhiye
mere sukūt apne savāloñ ko dekhiye
ab bhī haiñ aise log ki jin se sabaq mile
dil murda hai to zinda misāloñ ko dekhiye
kyā dekhte haiñ aap bahār-e-numū abhī
jab eḌiyoñ tak aa.eñ to bāloñ ko dekhiye
tabqe zamīñ ke hoñ ki hoñ aurāq-e-āsmāñ
qudrat ke dil-fareb risāloñ ko dekhiye
himmat ko dekhiye ki vahī mard-e-kār hai
faujoñ ko dekhiye na risāloñ ko dekhiye
taqlīd kyuuñ ḳhayāl o zabāñ meñ kisī kī ho
apne ḳhayāl apne maqāloñ ko dekhiye
dushman pe bhī nigāh rahe aib-bīñ hai vo
ye kyā ki sirf chāhne vāloñ ko dekhiye
saaqī kī chashm-e-mast kā nazzāra kījiye
sahbā ko dekhiye na piyāloñ ko dekhiye
dil dekhiye ki takmila-e-shauq ho 'azīz'
masjid ko dekhiye na shivāloñ ko dekhiye
jite hain kaise aisi misalon ko dekhiye
parda uTha ke chahne walon ko dekhiye
kya dil jigar hai chahne walon ko dekhiye
mere sukut apne sawalon ko dekhiye
ab bhi hain aise log ki jin se sabaq mile
dil murda hai to zinda misalon ko dekhiye
kya dekhte hain aap bahaar-e-numu abhi
jab eDiyon tak aaen to baalon ko dekhiye
tabqe zamin ke hon ki hon auraq-e-asman
qudrat ke dil-fareb risalon ko dekhiye
himmat ko dekhiye ki wahi mard-e-kar hai
faujon ko dekhiye na risalon ko dekhiye
taqlid kyun KHayal o zaban mein kisi ki ho
apne KHayal apne maqalon ko dekhiye
dushman pe bhi nigah rahe aib-bin hai wo
ye kya ki sirf chahne walon ko dekhiye
saqi ki chashm-e-mast ka nazzara kijiye
sahba ko dekhiye na piyalon ko dekhiye
dil dekhiye ki takmila-e-shauq ho 'aziz'
masjid ko dekhiye na shiwalon ko dekhiye
Source:
Karwaan-e-Ghazal (Pg. 61)
-
Author:
Farooq Argali
-
- Edition: 2004
- Publisher: Farid Book Depot (Pvt.) Ltd
- Year of Publication: 2004
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.