jite hain zindagi ko baDi sadgi se hum

jiite haiñ zindagī ko baḌī sādgī se ham

Darte nahīñ ḳhudā ke 'alāva kisī se ham

kyūñkar nibāh kar leñ bhalā tīrgī se ham

jab faizyāb ho ga.e haiñ raushnī se ham

aa.egā vaqt jab bhī to kar ke dikhā.eñge

ai āsmāñ batā.eñ tujhe kyā abhī se ham

apnī anā ko bech ke daulat kamāte gar

kaise nazar milāte bhalā zindagī se ham

shikva kareñ to kaise kareñ ye batā.iye

jab dil lagā ke baiThe haiñ ik ajnabī se ham

sab se du'ā salām hai jab apnā barqarār

kyūñkar kareñ gurez batāo kisī se ham

be-bāt yūñhī raat se bigḌī hai apnī baat

rūThī hai ham se zindagī aur zindagī se ham

jab se sunā hai aaj vo tashrīf lā.eñgī

ghar ko sajā ke baiThe haiñ yāroñ tabhī se ham

'tāriq' ye apnā shauq hai ḳhidmat adab kī hai

rozī nahīñ kamāte kabhī shā'irī se ham

jite hain zindagi ko baDi sadgi se hum

Darte nahin KHuda ke 'alawa kisi se hum

kyunkar nibah kar len bhala tirgi se hum

jab faizyab ho gae hain raushni se hum

aaega waqt jab bhi to kar ke dikhaenge

ai aasman bataen tujhe kya abhi se hum

apni ana ko bech ke daulat kamate gar

kaise nazar milate bhala zindagi se hum

shikwa karen to kaise karen ye bataiye

jab dil laga ke baiThe hain ek ajnabi se hum

sab se du'a salam hai jab apna barqarar

kyunkar karen gurez batao kisi se hum

be-baat yunhi raat se bigDi hai apni baat

ruThi hai hum se zindagi aur zindagi se hum

jab se suna hai aaj wo tashrif laengi

ghar ko saja ke baiThe hain yaron tabhi se hum

'tariq' ye apna shauq hai KHidmat adab ki hai

rozi nahin kamate kabhi sha'iri se hum