jiti raho kahaniyo milte hain yar ek din

jiitī raho kahāniyo milte haiñ yaar ek din

ek hazār ek raat ek hazār ek din

vāqa'ī jaise gum-shuda shaḳhs palaT ke aa gayā

mujh se basar nahīñ huā ek hī baar ek din

ḳhaak meñ kam numūd kī aag 'adam vajūd kī

umr-e-ḳhayām ek shab umr-e-ḳhumār ek din

manzil-e-jāñ tak ek din pahuñchegā jo dar asl hai

raah meñ baiTh jā.egā gard-o-ġhubār ek din

vo jise DhūñDtī phirī tum ne chhapā.ī Diary

yaad hai yaar ek baar yaad hai yaar ek din

aañkh bachā ke le gayā haath baḌhā ke le gayā

raat ke paar ek ḳhvāb ḳhvāb ke paar ek din

jhūTī haqīqatoñ se duur sachchī kahāniyāñ zarūr

jīteñ to vāpas aa sakeñ shāhsavār ek din

gaañv se gaañv Dākiye logoñ ke ḳhat paḌhā kiye

miir aman huā kiye bāġh-o-bahār ek din

ban ke bikhar to jā.uñgā rau ke sañvar to jā.uñgā

ḳhvāb-nagar to jā.uñgā āḳhirī baar ek din

baaqī zamāne chhoḌ de faanī fasāne chhoḌ de

merī tarah se merī jaan ḳhud pe guzār ek din

yaar ko gaaḌ kar sabhī gāḌiyoñ kī taraf baḌhe

kaTtā na thā tire baġhair yāroñ ke yaar ek din

duniyā se ek din vo shaḳhs dil kī taraf phir aa.egā

shahr meñ lauT aa.egī phir se bahār ek din

qasbe kī aurteñ jane bachchoñ sane bane Thane

rail jahāñ nahīñ rukī khokhrāpār ek din

jiti raho kahaniyo milte hain yar ek din

ek hazar ek raat ek hazar ek din

waqa'i jaise gum-shuda shaKHs palaT ke aa gaya

mujh se basar nahin hua ek hi bar ek din

KHak mein kam numud ki aag 'adam wajud ki

umr-e-KHayam ek shab umr-e-KHumar ek din

manzil-e-jaan tak ek din pahunchega jo dar asl hai

rah mein baiTh jaega gard-o-ghubar ek din

wo jise DhunDti phiri tum ne chhapai Diary

yaad hai yar ek bar yaad hai yar ek din

aankh bacha ke le gaya hath baDha ke le gaya

raat ke par ek KHwab KHwab ke par ek din

jhuTi haqiqaton se dur sachchi kahaniyan zarur

jiten to wapas aa saken shahsawar ek din

ganw se ganw Dakiye logon ke KHat paDha kiye

mir aman hua kiye bagh-o-bahaar ek din

ban ke bikhar to jaunga rau ke sanwar to jaunga

KHwab-nagar to jaunga aaKHiri bar ek din

baqi zamane chhoD de fani fasane chhoD de

meri tarah se meri jaan KHud pe guzar ek din

yar ko gaD kar sabhi gaDiyon ki taraf baDhe

kaTta na tha tere baghair yaron ke yar ek din

duniya se ek din wo shaKHs dil ki taraf phir aaega

shahr mein lauT aaegi phir se bahaar ek din

qasbe ki aurten jane bachchon sane bane Thane

rail jahan nahin ruki khokhrapar ek din