jitne marka-e-dil wo lagatar gaya

jītne mārka-e-dil vo lagātār gayā

jis ghaḌī fat.h kā e'lān huā haar gayā

thak ke lauT aa.e alam-dār-e-masāvāt āḳhir

duur tak silsila-e-andak-o-bisyār gayā

jis ko sab sahl-talab jaan ke karte the gurez

ik vahī shaḳhs sū-e-manzil-e-dushvār gayā

in dinoñ zehn kī duniyā meñ hai masrūf bashar

dil kī tahzīb ga.ī dard kā bevhār gayā

ham gunahgāroñ se bā-ma.anī rahā hashr kā din

varna ye saarā hī mansūba thā bekār gayā

'sāz' hai dil-zada ab bhī tire she'roñ ke tufail

ham to samjhe the ki ai miir ye āzār gayā

jitne marka-e-dil wo lagatar gaya

jis ghaDi fath ka e'lan hua haar gaya

thak ke lauT aae alam-dar-e-masawat aaKHir

dur tak silsila-e-andak-o-bisyar gaya

jis ko sab sahl-talab jaan ke karte the gurez

ek wahi shaKHs su-e-manzil-e-dushwar gaya

in dinon zehn ki duniya mein hai masruf bashar

dil ki tahzib gai dard ka bewhaar gaya

hum gunahgaron se ba-mani raha hashr ka din

warna ye sara hi mansuba tha bekar gaya

'saz' hai dil-zada ab bhi tere she'ron ke tufail

hum to samjhe the ki ai mir ye aazar gaya