jin ke raston se sada maine haTae patthar

jin ke rastoñ se sadā maiñ ne haTā.e patthar

vo mire sar ke liye DhūñD ke laa.e patthar

maiñ ne dekhā ki mire shīsha-e-jāñ par ik din

tere kūche meñ har ik samt se aa.e patthar

maiñ jise dekh ke hāthoñ meñ duā.eñ pahnūñ

vo mujhe dekh ke hāthoñ meñ uThā.e patthar

jo mujhe tere ta.alluq se mile maiñ ne vahī

kabhī chūme kabhī āñkhoñ se lagā.e patthar

maiñ use zaḳhm-e-mohabbat pe sajā kar rakkhūñ

dasht-e-ulfat se jo mere liye aa.e patthar

terī āñkhoñ ke taġhāful se tire pahlū meñ

jab mire ḳhvāb nahā.e to nahā.e patthar

us kī ḳhushbū kī talab meñ jo maiñ ghar se niklī

us ne phūloñ kī tarah mujh pe luTā.e patthar

vo haiñ phūloñ kī tarah merī nazar meñ 'afroz'

jitne bhī mere lahū meñ haiñ nahā.e patthar

jin ke raston se sada main ne haTae patthar

wo mere sar ke liye DhunD ke lae patthar

main ne dekha ki mere shisha-e-jaan par ek din

tere kuche mein har ek samt se aae patthar

main jise dekh ke hathon mein duaen pahnun

wo mujhe dekh ke hathon mein uThae patthar

jo mujhe tere talluq se mile main ne wahi

kabhi chume kabhi aankhon se lagae patthar

main use zaKHm-e-mohabbat pe saja kar rakkhun

dasht-e-ulfat se jo mere liye aae patthar

teri aankhon ke taghaful se tere pahlu mein

jab mere KHwab nahae to nahae patthar

us ki KHushbu ki talab mein jo main ghar se nikli

us ne phulon ki tarah mujh pe luTae patthar

wo hain phulon ki tarah meri nazar mein 'afroz'

jitne bhi mere lahu mein hain nahae patthar