jinhen sapnon ki KHatir rote dekha

jinheñ sapnoñ kī ḳhātir rote dekhā

unheñ sapnoñ ko hī phir Dhote dekhā

jo bhā.ī-chāre kī karte himāyat

unheñ nafrat kī fasleñ bote dekhā

dikhānā rāstā thā kaam jis kā

usī rahbar ko ham ne sote dekhā

jo mahfil meñ hañsāte haiñ sabhī ko

akele meñ unheñ bhī rote dekhā

jo kahte haiñ ki ye duniyā hai faanī

unhīñ ko rang-o-ras meñ khote dekhā

jinhen sapnon ki KHatir rote dekha

unhen sapnon ko hi phir Dhote dekha

jo bhai-chaare ki karte himayat

unhen nafrat ki faslen bote dekha

dikhana rasta tha kaam jis ka

usi rahbar ko hum ne sote dekha

jo mahfil mein hansate hain sabhi ko

akele mein unhen bhi rote dekha

jo kahte hain ki ye duniya hai fani

unhin ko rang-o-ras mein khote dekha