jins-e-dil le kar bhare bazar tak pahuncha nahin

jins-e-dil le kar bhare bāzār tak pahuñchā nahīñ

ek tak pahuñchā huuñ maiñ do-chār tak pahuñchā nahīñ

mere pahlū se gurezāñ hai vo merā ḳhush-badan

ik hiran hai jo abhī tātār tak pahuñchā nahīñ

dekhne meñ kuchh nahīñ hai vaqt kī ye āb-jū

koī lekin us nadī ke paar tak pahuñchā nahīñ

kāġhazoñ par ham lakīreñ khīñchte hī rah ga.e

silsila harf-e-abad-āsār tak pahuñchā nahīñ

us ko dasht-e-zindagī meñ koī manzil kab milī

jo ġhazāl-e-vaqt kī raftār tak pahuñchā nahīñ

kuchh na kuchh vāmāñdgāñ ko de pazīrā.ī kā haq

Thiik hai koī tire me.aar tak pahuñchā nahīñ

tīrgī kī joñk ne sab pī liyā merā lahū

koī sūraj mere zaḳhm-e-tār tak pahuñchā nahīñ

yaar us maftūh laḌkī meñ balā kā husn thā

meñ hī buzdil thā jo dil kī haar tak pahuñchā nahīñ

shā.erī ko ye sharaf mujh se milā ‘yāvar-azīm’

maiñ ġhazal le kar kabhī darbār tak pahuñchā nahīñ

jins-e-dil le kar bhare bazar tak pahuncha nahin

ek tak pahuncha hun main do-chaar tak pahuncha nahin

mere pahlu se gurezan hai wo mera KHush-badan

ek hiran hai jo abhi tatar tak pahuncha nahin

dekhne mein kuchh nahin hai waqt ki ye aab-ju

koi lekin us nadi ke par tak pahuncha nahin

kaghazon par hum lakiren khinchte hi rah gae

silsila harf-e-abad-asar tak pahuncha nahin

us ko dasht-e-zindagi mein koi manzil kab mili

jo ghazal-e-waqt ki raftar tak pahuncha nahin

kuchh na kuchh wamandgan ko de pazirai ka haq

Thik hai koi tere mear tak pahuncha nahin

tirgi ki jonk ne sab pi liya mera lahu

koi suraj mere zaKHm-e-tar tak pahuncha nahin

yar us maftuh laDki mein bala ka husn tha

mein hi buzdil tha jo dil ki haar tak pahuncha nahin

shaeri ko ye sharaf mujh se mila ‘yawar-azim’

main ghazal le kar kabhi darbar tak pahuncha nahin