jis din se meri tum se shanasai hui hai

jis din se mirī tum se shanāsā.ī huī hai

us din se mirī aur bhī rusvā.ī huī hai

tum ne hī nazar bhar ke nahīñ dekhā hai mujh ko

aise meñ bhalā ḳhaak pazīrā.ī huī hai

qissa jo nayā paas koī hai to sunāo

ye baat to sau baar kī dohrā.ī huī hai

chāhūñ bhī to maiñ toḌ nahīñ pā.ūñgī is ko

rasmoñ kī ye zanjīr jo pahnā.ī huī hai

tū ne bhī uḌaa.ī hai hasīñ zindagī merī

tū bhī to mire ġham kī tamāshā.ī huī hai

sach pūchho to badnām hue naam kī ḳhātir

shohrat se ziyāda mirī rusvā.ī huī hai

rahne deñ karam ham pe ki ye jaan hamārī

hamdardiyoñ se aap kī ghabrā.ī huī hai

tum phir se uThā laa.e ho duniyā ko kahāñ se

ye to mirī sau baar kī Thukrā.ī huī hai

jis din se meri tum se shanasai hui hai

us din se meri aur bhi ruswai hui hai

tum ne hi nazar bhar ke nahin dekha hai mujh ko

aise mein bhala KHak pazirai hui hai

qissa jo naya pas koi hai to sunao

ye baat to sau bar ki dohrai hui hai

chahun bhi to main toD nahin paungi is ko

rasmon ki ye zanjir jo pahnai hui hai

tu ne bhi uDai hai hasin zindagi meri

tu bhi to mere gham ki tamashai hui hai

sach puchho to badnam hue nam ki KHatir

shohrat se ziyaada meri ruswai hui hai

rahne den karam hum pe ki ye jaan hamari

hamdardiyon se aap ki ghabrai hui hai

tum phir se uTha lae ho duniya ko kahan se

ye to meri sau bar ki Thukrai hui hai