jis gham se dil ko rahat ho us gham ka mudawa kya mani

jis ġham se dil ko rāhat ho us ġham kā mudāvā kyā ma.anī

jab fitrat tūfānī Thahrī sāhil kī tamannā kyā ma.anī

ishrat meñ rañj kī āmezish rāhat meñ alam kī ālā.ish

jab duniyā aisī duniyā hai phir duniyā duniyā kyā ma.anī

ḳhud shaiḳh-o-barahman mujrim haiñ ik kaam se donoñ pī na sake

saaqī kī buḳhl-pasandī par saaqī kā shikvā kyā ma.anī

jalvoñ kā to ye dastūr nahīñ pardoñ se kabhī bāhar aa.eñ

ai dīda-e-be-taufīq tirā ye zauq-e-tamāshā kyā ma.anī

iḳhlās-o-vafā ke sajdoñ kī jis dar par daad nahīñ miltī

ai ġhairat-e-dil ai azm-e-ḳhudī us dar par sajda kyā ma.anī

ai sāhib-e-naqd-o-nazar maanā insāñ kā nizām nahīñ achchhā

is kī islāh ke parde meñ allāh se jhagḌā kyā ma.anī

har-lahza fuzūñ ho josh-e-amal ye farz hai farz kī raah pe chal

tadbīr kā ye ronā kaisā taqdīr kā shikvā kyā ma.anī

maiḳhāne meñ tū ai vaa.iz ab talqīn ke kuchh uslūb badal

allāh kā banda banñe ko jannat kā sahārā kyā ma.anī

iz.hār-e-vafā lāzim hī sahī ai 'arsh' magar fariyādeñ kyuuñ

vo baat jo sab par zāhir hai us baat kā charchā kyā ma.anī

jis gham se dil ko rahat ho us gham ka mudawa kya mani

jab fitrat tufani Thahri sahil ki tamanna kya mani

ishrat mein ranj ki aamezish rahat mein alam ki aalaish

jab duniya aisi duniya hai phir duniya duniya kya mani

KHud shaiKH-o-barahman mujrim hain ek kaam se donon pi na sake

saqi ki buKHl-pasandi par saqi ka shikwa kya mani

jalwon ka to ye dastur nahin pardon se kabhi bahar aaen

ai dida-e-be-taufiq tera ye zauq-e-tamasha kya mani

iKHlas-o-wafa ke sajdon ki jis dar par dad nahin milti

ai ghairat-e-dil ai azm-e-KHudi us dar par sajda kya mani

ai sahib-e-naqd-o-nazar mana insan ka nizam nahin achchha

is ki islah ke parde mein allah se jhagDa kya mani

har-lahza fuzun ho josh-e-amal ye farz hai farz ki rah pe chal

tadbir ka ye rona kaisa taqdir ka shikwa kya mani

maiKHane mein tu ai waiz ab talqin ke kuchh uslub badal

allah ka banda banne ko jannat ka sahaara kya mani

izhaar-e-wafa lazim hi sahi ai 'arsh' magar fariyaaden kyun

wo baat jo sab par zahir hai us baat ka charcha kya mani