jis ki KHwahish thi chale waqt ki raftar ke sath

jis kī ḳhvāhish thī chale vaqt kī raftār ke saath

aaj vo shaḳhs zamīñ-bos hai dastār ke saath

go munāfiq hai magar phir bhī hasīñ lagtā hai

jab bhī miltā hai vo miltā hai baḌe pyaar ke saath

tū agar ai mire sālār isī meñ ḳhush hai

rehn rakh dete haiñ dastār bhī talvār ke saath

kaisā mausam hai ki har samt nazar aate haiñ

sar samar kī tarah laTke hue ashjār ke saath

jaane kyā baat use ghar se uThā laa.ī hai

ḳhvāb bhī bechtī phirtī hai vo aḳhbār ke saath

ai mire zūd-farāmosh kabhī dekh idhar

kyā guzartī hai yahāñ par tire shah-kār ke saath

dekh letā hai faqat ek nazar jo bhī tujhe

baiTh jaatā hai vo lag kar tirī dīvār ke saath

daad degā mire ash.ār kī lekin pahle

soch ke zāviye parkhegā vo parkār ke saath

'ġhālib'-o-'faiz' se rishta hai vo apnā 'az.har'

jaise ik kuuñj kā rishta ho kisī Daar ke saath

jis ki KHwahish thi chale waqt ki raftar ke sath

aaj wo shaKHs zamin-bos hai dastar ke sath

go munafiq hai magar phir bhi hasin lagta hai

jab bhi milta hai wo milta hai baDe pyar ke sath

tu agar ai mere salar isi mein KHush hai

rehn rakh dete hain dastar bhi talwar ke sath

kaisa mausam hai ki har samt nazar aate hain

sar samar ki tarah laTke hue ashjar ke sath

jaane kya baat use ghar se uTha lai hai

KHwab bhi bechti phirti hai wo aKHbar ke sath

ai mere zud-faramosh kabhi dekh idhar

kya guzarti hai yahan par tere shah-kar ke sath

dekh leta hai faqat ek nazar jo bhi tujhe

baiTh jata hai wo lag kar teri diwar ke sath

dad dega mere ashaar ki lekin pahle

soch ke zawiye parkhega wo parkar ke sath

'ghaalib'-o-'faiz' se rishta hai wo apna 'azhar'

jaise ek kunj ka rishta ho kisi Dar ke sath