jis ko chalna hai chale raKHt-e-safar bandhe hue

jis ko chalnā hai chale raḳht-e-safar bāñdhe hue

ham jahāñ-gasht haiñ uTThe haiñ kamar bāñdhe hue

yuuñ to har gaam ka.ī daam haiñ dasht-e-shab meñ

ham bhī aa.e haiñ par-o-bāl-e-sahar bāñdhe hue

sū-e-aflāk safīrān-e-duā jaate haiñ

Dar hai lauT aa.eñ na zanjīr-e-asar bāñdhe hue

ahl-e-zindāñ haiñ abhī muntazir-e-fasl-e-bahār

shāḳh-e-fardā se ḳhayāl-e-gul-e-tar bāñdhe hue

dasht-e-imkāñ meñ koī saath mirā de na sakā

kitne rahbar mile dastār-e-ḳhizar bāñdhe hue

koī āġhosh kushāda hai na vā koī nazar

ya.anī jo dar hai koī parda-e-dar bāñdhe hue

bujh ga.ī sham.a nazar muñd ga.iiñ shab kī āñkheñ

sub.h ab aa.ī hai pushtāra-e-zar bāñdhe hue

ham 'tamannā.ī' jahān-e-guzarāñ kī rau meñ

sū-e-shabnam chale ummīd-e-sharar bāñdhe hue

jis ko chalna hai chale raKHt-e-safar bandhe hue

hum jahan-gasht hain uTThe hain kamar bandhe hue

yun to har gam kai dam hain dasht-e-shab mein

hum bhi aae hain par-o-baal-e-sahar bandhe hue

su-e-aflak safiran-e-dua jate hain

Dar hai lauT aaen na zanjir-e-asar bandhe hue

ahl-e-zindan hain abhi muntazir-e-fasl-e-bahaar

shaKH-e-farda se KHayal-e-gul-e-tar bandhe hue

dasht-e-imkan mein koi sath mera de na saka

kitne rahbar mile dastar-e-KHizar bandhe hue

koi aaghosh kushada hai na wa koi nazar

yani jo dar hai koi parda-e-dar bandhe hue

bujh gai shama nazar mund gain shab ki aankhen

subh ab aai hai pushtara-e-zar bandhe hue

hum 'tamannai' jahan-e-guzaran ki rau mein

su-e-shabnam chale ummid-e-sharar bandhe hue