jis ko hasti o adam jaante hain

jis ko hastī o adam jānte haiñ

hai vo kuchh aur hī ham jaate haiñ

kūcha-e-jumb se mulhaq hai shaiḳh

ham jise rāh-e-haram jānte haiñ

juzv o kul ek hai juuñ qatra-e-bahr

bahut is ramz ko kam jānte haiñ

shāhid-e-ḳhūb o makān-e-dilchasp

ham yahī huur o iram jānte haiñ

kah na mat khā mire sar kī saugand

ham to ik ye hī qasam jānte haiñ

kahte ho ā.ūñgā maiñ ik dam meñ

aise ham saikaḌoñ dam jānte haiñ

dil jo taabe na ho apne 'qā.em'

ham use chhātī pe jam jānte haiñ

jis ko hasti o adam jaante hain

hai wo kuchh aur hi hum jate hain

kucha-e-jumb se mulhaq hai shaiKH

hum jise rah-e-haram jaante hain

juzw o kul ek hai jun qatra-e-bahr

bahut is ramz ko kam jaante hain

shahid-e-KHub o makan-e-dilchasp

hum yahi hur o iram jaante hain

kah na mat kha mere sar ki saugand

hum to ek ye hi qasam jaante hain

kahte ho aaunga main ek dam mein

aise hum saikaDon dam jaante hain

dil jo tabe na ho apne 'qaem'

hum use chhati pe jam jaante hain