jis ne banaya har aaina main hi tha

jis ne banāyā har ā.īna maiñ hī thā

aur phir us meñ apnā tamāsha maiñ hī thā

mere qatl kā jashn manāyā duniyā ne

phir duniyā ne dekhā zinda maiñ hī thā

mahl-sarā ke sab chehroñ ko jāntā huuñ

jis se ga.e the dil tak rāsta maiñ hī thā

dekh liyā zindānoñ kī dīvāroñ ne

un se qad meñ buland-o-bālā maiñ hī thā

maiñ hī nahīñ to kaun se log aur kaise log

kaun sī duniyā sāhab-e-duniyā maiñ hī thā

mulkoñ mulkoñ phir kar ḳhālī haath miyāñ

lauTne vaalā vo shahzāda maiñ hī thā

duniyā tū ne ḳhālī haath mujhe jaanā

zālim terā sab sarmāya maiñ hī thā

merā surāġh lagāne vaale jānte haiñ

jab tak thā maiñ apnā havāla maiñ hī thā

jis ne banaya har aaina main hi tha

aur phir us mein apna tamasha main hi tha

mere qatl ka jashn manaya duniya ne

phir duniya ne dekha zinda main hi tha

mahl-sara ke sab chehron ko jaanta hun

jis se gae the dil tak rasta main hi tha

dekh liya zindanon ki diwaron ne

un se qad mein buland-o-baala main hi tha

main hi nahin to kaun se log aur kaise log

kaun si duniya sahab-e-duniya main hi tha

mulkon mulkon phir kar KHali hath miyan

lauTne wala wo shahzada main hi tha

duniya tu ne KHali hath mujhe jaana

zalim tera sab sarmaya main hi tha

mera suragh lagane wale jaante hain

jab tak tha main apna hawala main hi tha