jis ne tamir mein ek umr guzari main hun

jis ne tā'mīr meñ ik 'umr guzārī maiñ huuñ

jis kī fitrat hai bahut dard-shi’ārī maiñ huuñ

bhūltā kyoñ hai ki tū but huā kartā thā kabhī

bhūltā kyoñ hai tirā pahlā pujārī maiñ huuñ

aap ḳhāmosh raheñ aap tamāshā.ī haiñ

shor kā kaam hai merā ki madārī maiñ huuñ

apne hirnoñ ko maiñ ye baat batā.ūñ kaise

ek iklautā yahāñ in kā shikārī maiñ huuñ

tīs-battīs baras meñ huā hai pahlī baar

zehn par apne ka.ī roz se taarī maiñ huuñ

saath ho jaa.eñ to duniyā ko banā deñ rangīn

rang tujh par haiñ sabhī aur lalārī maiñ huuñ

jis ne ta'mir mein ek 'umr guzari main hun

jis ki fitrat hai bahut dard-shi’ari main hun

bhulta kyon hai ki tu but hua karta tha kabhi

bhulta kyon hai tera pahla pujari main hun

aap KHamosh rahen aap tamashai hain

shor ka kaam hai mera ki madari main hun

apne hirnon ko main ye baat bataun kaise

ek iklauta yahan in ka shikari main hun

tis-battis baras mein hua hai pahli bar

zehn par apne kai roz se tari main hun

sath ho jaen to duniya ko bana den rangin

rang tujh par hain sabhi aur lalari main hun