jis se zamana silsila-e-KHwab le gaya

jis se zamāna silsila-e-ḳhvāb le gayā

maiñ dil kī anjuman meñ vo mahtāb le gayā

ilzām-e-be-ḳhudī hameñ manzūr hai magar

ye to batāo kaun mai-e-nāb le gayā

jis se zamāna-sāzoñ ke chehre utar ga.e

vo hausle kahāñ dil-e-betāb le gayā

maiñ āgahī ke zahr se labrez jaam thā

ik dast-e-ishtiyāq mujhe daab le gayā

ashkoñ ko rok ḳhud hī na ġharqāb ho kahīñ

mizhgāñ ko khol shahr ko sailāb le gayā

mere liye vajūd kī chādar ko chhoḌ kar

vo kaun hai jo resham-o-kam-ḳhvāb le gayā

mad.hosh jis se saarā zamāna huā 'ḳhalish'

saaqī kahāñ vo sāġhar-e-nāyāb le gayā

jis se zamana silsila-e-KHwab le gaya

main dil ki anjuman mein wo mahtab le gaya

ilzam-e-be-KHudi hamein manzur hai magar

ye to batao kaun mai-e-nab le gaya

jis se zamana-sazon ke chehre utar gae

wo hausle kahan dil-e-betab le gaya

main aagahi ke zahr se labrez jam tha

ek dast-e-ishtiyaq mujhe dab le gaya

ashkon ko rok KHud hi na gharqab ho kahin

mizhgan ko khol shahr ko sailab le gaya

mere liye wajud ki chadar ko chhoD kar

wo kaun hai jo resham-o-kam-KHwab le gaya

madhosh jis se sara zamana hua 'KHalish'

saqi kahan wo saghar-e-nayab le gaya