jis tarah chahiye kab kar-e-wafa hota hai

jis tarah chāhiye kab kār-e-vafā hotā hai

haq mohabbat kā kahāñ ham se adā hotā hai

ham bahut chāhte haiñ amn-o-mohabbat har sū

vahī hotā hai jo manzūr-e-ḳhudā hotā hai

mushkiloñ meñ bhī buzurgoñ kā vazīfa ye thā

achchhe kāmoñ kā to achchhā hī silā hotā hai

fitratan saaz meñ āvāz kahāñ hotī hai

ik zarā chheḌiye phir dekhiye kyā hotā hai

koī majbūrī uThā detī hai dīvār-e-anā

apnī marzī se bhalā kaun burā hotā hai

har vo insān ki jo dāvat-e-haq detā ho

na sahī qibla magar qibla-numā hotā hai

jis tarah chahiye kab kar-e-wafa hota hai

haq mohabbat ka kahan hum se ada hota hai

hum bahut chahte hain amn-o-mohabbat har su

wahi hota hai jo manzur-e-KHuda hota hai

mushkilon mein bhi buzurgon ka wazifa ye tha

achchhe kaamon ka to achchha hi sila hota hai

fitratan saz mein aawaz kahan hoti hai

ek zara chheDiye phir dekhiye kya hota hai

koi majburi uTha deti hai diwar-e-ana

apni marzi se bhala kaun bura hota hai

har wo insan ki jo dawat-e-haq deta ho

na sahi qibla magar qibla-numa hota hai