jis tarah sang mein shahkar bhi rah sakte hain

jis tarah sang meñ shahkār bhī rah sakte haiñ

us tarah ham pas-e-dīvār bhī rah sakte haiñ

tere aane se ḳhushī lauT bhī saktī hai magar

aur kuchh hijr ke āsār bhī rah sakte haiñ

adliya adl ke me.aar se gir saktī hai

qaid meñ sāhib-e-kirdār bhī rah sakte haiñ

ham faqīroñ meñ kahāñ hai koī tafrīq kī baat

ham faqīroñ meñ to sardār bhī rah sakte haiñ

kuchh ghaḌī duur to rah merī taḌap kī ḳhātir

varna ham qurb se bezār bhī rah sakte haiñ

ye siyāsat hai yahāñ sab ko jagah miltī hai

maulvī faujī-o-fankār bhī rah sakte haiñ

aap chāheñ to hameñ chhoḌ deñ chalte chalte

aap chāheñ to vafādār bhī rah sakte haiñ

ye zarūrī to nahīñ sāmne aa kar kheleñ

kuchh khilāḌī pas-e-darbār bhī rah sakte haiñ

dekhne vāloñ ne mahdūd kiyā hai 'mūsā'

varna ham tuur ke us paar bhī rah sakte haiñ

jis tarah sang mein shahkar bhi rah sakte hain

us tarah hum pas-e-diwar bhi rah sakte hain

tere aane se KHushi lauT bhi sakti hai magar

aur kuchh hijr ke aasar bhi rah sakte hain

adliya adl ke mear se gir sakti hai

qaid mein sahib-e-kirdar bhi rah sakte hain

hum faqiron mein kahan hai koi tafriq ki baat

hum faqiron mein to sardar bhi rah sakte hain

kuchh ghaDi dur to rah meri taDap ki KHatir

warna hum qurb se bezar bhi rah sakte hain

ye siyasat hai yahan sab ko jagah milti hai

maulwi fauji-o-fankar bhi rah sakte hain

aap chahen to hamein chhoD den chalte chalte

aap chahen to wafadar bhi rah sakte hain

ye zaruri to nahin samne aa kar khelen

kuchh khilaDi pas-e-darbar bhi rah sakte hain

dekhne walon ne mahdud kiya hai 'musa'

warna hum tur ke us par bhi rah sakte hain