jis tayaqqun se jo likhna tha nahin likkha gaya

jis tayaqqun se jo likhnā thā nahīñ likkhā gayā

āsmāñ kaaT ke miTTī pe zamīñ likkhā gayā

merī peshānī damaktī hai sitāroñ se sivā

tere hāthoñ se jahāñ harf-e-yaqīñ likkhā gayā

mauj-dar-mauj samundar se mulāqāt huī

ḳhvāb ko ḳhvāb sar-e-sat.h-e-zamīñ likkhā gayā

aks-dar-aks jo likhnā thā mujhe us kā jamāl

ā.ina-ḳhāna-e-hairat ke ta.iiñ likkhā gayā

dekh kar us ko mire hosh Thikāne na rahe

ism likhnā thā kahīñ aur kahīñ likkhā gayā

haañ uThāyā thā qalam karbalā vāloñ ke liye

likhnā chāhā thā magar mujh se nahīñ likkhā gayā

donoñ sarmast haiñ ehsās-e-suḳhan-sāzī meñ

raushnī aañkh ko aur dil ko hazīñ likkhā gayā

yuuñ to safhāt siyah kartā rahā maiñ 'az.har'

chāhtā thā jo mirā shauq nahīñ likkhā gayā

jis tayaqqun se jo likhna tha nahin likkha gaya

aasman kaT ke miTTi pe zamin likkha gaya

meri peshani damakti hai sitaron se siwa

tere hathon se jahan harf-e-yaqin likkha gaya

mauj-dar-mauj samundar se mulaqat hui

KHwab ko KHwab sar-e-sath-e-zamin likkha gaya

aks-dar-aks jo likhna tha mujhe us ka jamal

aaina-KHana-e-hairat ke tain likkha gaya

dekh kar us ko mere hosh Thikane na rahe

ism likhna tha kahin aur kahin likkha gaya

han uThaya tha qalam karbala walon ke liye

likhna chaha tha magar mujh se nahin likkha gaya

donon sarmast hain ehsas-e-suKHan-sazi mein

raushni aankh ko aur dil ko hazin likkha gaya

yun to safhat siyah karta raha main 'azhar'

chahta tha jo mera shauq nahin likkha gaya