jise dekha tera joya hai pyare

jise dekhā tirā joyā hai pyāre

tujhī ko DhūñDhne khoyā hai pyāre

qasam hai dīda-e-giryāñ kī mujh ko

ki duniyā ālam-e-royā hai pyāre

nihāl-e-āh hogā dāna-e-ashk

ūgegā vo jo kuchh boyā hai pyāre

tujhe dil de ke maiñ ne āzmāyā

vo sīkhā jis ne kuchh khoyā hai pyāre

kisī ke kaan bharne par na rakh dhyān

har ek muñh meñ zabāñ goyā hai pyāre

maiñ jaagā shab sar-e-gesū meñ varna

jise kaalā Dase soyā hai pyāre

mirā dil jal-bujhā shab se yahāñ kuuñ

charāġh-e-murdā par royā hai pyāre

nazāra kab kiyā us chashm-e-tar ne

abas dāman tirā dhoyā hai pyāre

milā do lab kahāñ kā āb-e-haivāñ

ḳhizar kā rāsta khoyā hai pyāre

kafan apne 'nasīm'-e-kushta kā sūnkh

har ek barg-e-gul boyā hai pyāre

jise dekha tera joya hai pyare

tujhi ko DhunDhne khoya hai pyare

qasam hai dida-e-giryan ki mujh ko

ki duniya aalam-e-roya hai pyare

nihaal-e-ah hoga dana-e-ashk

ugega wo jo kuchh boya hai pyare

tujhe dil de ke main ne aazmaya

wo sikha jis ne kuchh khoya hai pyare

kisi ke kan bharne par na rakh dhyan

har ek munh mein zaban goya hai pyare

main jaga shab sar-e-gesu mein warna

jise kala Dase soya hai pyare

mera dil jal-bujha shab se yahan kun

charagh-e-murda par roya hai pyare

nazara kab kiya us chashm-e-tar ne

abas daman tera dhoya hai pyare

mila do lab kahan ka aab-e-haiwan

KHizar ka rasta khoya hai pyare

kafan apne 'nasim'-e-kushta ka sunkh

har ek barg-e-gul boya hai pyare