jise milen wahi tanha dikhai deta hai

jise mileñ vahī tanhā dikhā.ī detā hai

hisār-e-zāt meñ simTā dikhā.ī detā hai

kisī ke sar pe koī sā.ebāñ nahīñ har shaḳhs

ḳhud apnī chhāñv meñ baiThā dikhā.ī detā hai

vo daur-e-tesha-girī hai ki aadmī kā vajūd

har ek samt se TuuTā dikhā.ī detā hai

sazā-e-dār abhī tak hai ahl-e-haq ke liye

abhī salīb pe iisā dikhā.ī detā hai

dhuāñ dhuāñ hai fazā ātish-e-ta.assub se

nagar nagar mujhe jaltā dikhā.ī detā hai

ye kaifiyat hai junūñ kī yā dil kī vīrānī

ki apnā ghar mujhe sahrā dikhā.ī detā hai

bhaTak rahī hai kisī karbalā meñ 'soz' kī ruuh

kuchh is tarah se vo pyāsā dikhā.ī detā hai

jise milen wahi tanha dikhai deta hai

hisar-e-zat mein simTa dikhai deta hai

kisi ke sar pe koi saeban nahin har shaKHs

KHud apni chhanw mein baiTha dikhai deta hai

wo daur-e-tesha-giri hai ki aadmi ka wajud

har ek samt se TuTa dikhai deta hai

saza-e-dar abhi tak hai ahl-e-haq ke liye

abhi salib pe isa dikhai deta hai

dhuan dhuan hai faza aatish-e-tassub se

nagar nagar mujhe jalta dikhai deta hai

ye kaifiyat hai junun ki ya dil ki virani

ki apna ghar mujhe sahra dikhai deta hai

bhaTak rahi hai kisi karbala mein 'soz' ki ruh

kuchh is tarah se wo pyasa dikhai deta hai