jise tu ne samjha hai zindagi usi inqalab ka nam hai

jise tū ne samjhā hai zindagī usī inqalāb kā naam hai

kabhī din huā kabhī shab huī kabhī sub.h hai kabhī shaam hai

tah-e-ḳhāk bhī dil-e-mubtalā ko kabhī qarār na aa.egā

huuñ abhī se hashr kā muntazir ki naved jalva-e-ām hai

koī hausla hai na mudda.ā koī aarzū hai na iltijā

mire dil meñ ik tirī yaad hai mire lab pe ik tirā naam hai

vahāñ va.ade hote haiñ aa.e din sar-e-shām ḳhvāb meñ ā.eñge

yahāñ iztirāb-e-tamām se mirī shab kī niiñd harām hai

tū sharāb de ki na de magar mire dil ko toḌ na sāqiyā

ki ġharīb bāda-parast kā yahī shīsha hai yahī jaam hai

mire zauq-e-dīd kā ho burā kahāñ jā ke señke koī nazar

na tajallī-e-sar-e-rah-guzar na tajallī-e-sar-e-bām hai

mirī qaid-e-zīst ke saath hī hai ajal kī qaid lagī huī

huuñ sarīr meñ vo asīr-e-ġham jo qafas meñ bhī tah-e-dām hai

jise tu ne samjha hai zindagi usi inqalab ka nam hai

kabhi din hua kabhi shab hui kabhi subh hai kabhi sham hai

tah-e-KHak bhi dil-e-mubtala ko kabhi qarar na aaega

hun abhi se hashr ka muntazir ki nawed jalwa-e-am hai

koi hausla hai na muddaa koi aarzu hai na iltija

mere dil mein ek teri yaad hai mere lab pe ek tera nam hai

wahan wade hote hain aae din sar-e-sham KHwab mein aaenge

yahan iztirab-e-tamam se meri shab ki nind haram hai

tu sharab de ki na de magar mere dil ko toD na saqiya

ki gharib baada-parast ka yahi shisha hai yahi jam hai

mere zauq-e-did ka ho bura kahan ja ke senke koi nazar

na tajalli-e-sar-e-rah-guzar na tajalli-e-sar-e-baam hai

meri qaid-e-zist ke sath hi hai ajal ki qaid lagi hui

hun sarir mein wo asir-e-gham jo qafas mein bhi tah-e-dam hai