jism jab mahw-e-suKHan hon shab-e-KHamoshi se

jism jab mahv-e-suḳhan hoñ shab-e-ḳhāmoshī se

lafz to dete haiñ garmī-e-ham-āġhoshī se

saḳht ahkām-e-mohabbat haiñ ki daurān-e-visāl

lafz aage na baḌheñ sarhad-e-sargoshī se

nashsha baḌhtā hai hameñ der meñ mai-noshī ke ba.ad

us kī gunjān ḳhamoshī kī navā-noshī se

dekhne hoñ kabhī ma.anī bhī to phir ḳhāk-e-visāl

ek do lafz jalā detī hai ḳhāmoshī se

jhāḌā-pochhā thā abhī sub.h ko hī ḳhāna-e-yād

shaam tak aT gayā phir gard-e-farāmoshī se

shahr kā shor pahuñchtā hī nahīñ ab mujh tak

āfiyat meñ huuñ mohabbat kī girāñ-goshī se

aable paañv ke pā-posh hue āḳhir-kār

umr-bhar jaan bachā.ī thī jo pā-poshī se

log banvāne lage vaise hī zaḳhmoñ ke libās

tarz-e-nau chal ga.ī 'ehsās' kī ḳhush-poshī se

ātish-e-'farhat'-o-'asmā' ne jalā.e do charāġh

ek bīnish se jalā ek jalā yūshī se

jism jab mahw-e-suKHan hon shab-e-KHamoshi se

lafz to dete hain garmi-e-ham-aghoshi se

saKHt ahkaam-e-mohabbat hain ki dauran-e-visal

lafz aage na baDhen sarhad-e-sargoshi se

nashsha baDhta hai hamein der mein mai-noshi ke baad

us ki gunjaan KHamoshi ki nawa-noshi se

dekhne hon kabhi mani bhi to phir KHak-e-visal

ek do lafz jala deti hai KHamoshi se

jhaDa-pochha tha abhi subh ko hi KHana-e-yaad

sham tak aT gaya phir gard-e-faramoshi se

shahr ka shor pahunchta hi nahin ab mujh tak

aafiyat mein hun mohabbat ki giran-goshi se

aable panw ke pa-posh hue aaKHir-kar

umr-bhar jaan bachai thi jo pa-poshi se

log banwane lage waise hi zaKHmon ke libas

tarz-e-nau chal gai 'ehsas' ki KHush-poshi se

aatish-e-'farhat'-o-'asma' ne jalae do charagh

ek binish se jala ek jala yushi se