jism ke is ghaar mein dikhta hai sab

jism ke is ġhaar meñ dikhtā hai sab

ret ke ambār meñ dikhtā hai sab

chāñdnī kā nuur sūraj kā ġhurūr

mujh ko mere yaar meñ dikhtā hai sab

TūTtī ummīd martā hausla

Dheh rahī dīvār meñ dikhtā hai sab

maut ke dar zindagī kā intizār

dekhiye bīmār meñ dikhtā hai sab

aa.ine saare haTā kar rakh diye

ghar kī har dīvār meñ dikhtā hai sab

har safar manzil se kitnā duur hai

vaqt kī raftār meñ dikhtā hai sab

zindagī kī kyā anā se jang thī

is phaTī dastār meñ dikhtā hai sab

qurbateñ rishta mohabbat dostī

āj-kal bāzār meñ dikhtā hai sab

huuñ bahut gum-sum bahut chup-chāp par

barf ke angār meñ dikhtā hai sab

sab chhupā letī hai dilkash guftugū

haañ magar kirdār meñ dikhtā hai sab

un ko to 'sāhil' se sab kuchh chāhiye

aur hameñ mañjdhār meñ dikhtā hai sab

jism ke is ghaar mein dikhta hai sab

ret ke ambar mein dikhta hai sab

chandni ka nur suraj ka ghurur

mujh ko mere yar mein dikhta hai sab

TuTti ummid marta hausla

Dheh rahi diwar mein dikhta hai sab

maut ke dar zindagi ka intizar

dekhiye bimar mein dikhta hai sab

aaine sare haTa kar rakh diye

ghar ki har diwar mein dikhta hai sab

har safar manzil se kitna dur hai

waqt ki raftar mein dikhta hai sab

zindagi ki kya ana se jang thi

is phaTi dastar mein dikhta hai sab

qurbaten rishta mohabbat dosti

aaj-kal bazar mein dikhta hai sab

hun bahut gum-sum bahut chup-chap par

barf ke angar mein dikhta hai sab

sab chhupa leti hai dilkash guftugu

han magar kirdar mein dikhta hai sab

un ko to 'sahil' se sab kuchh chahiye

aur hamein manjdhaar mein dikhta hai sab