jism kya hai kuchh nahin hai ek ghar miTTi ka hai

jism kyā hai kuchh nahīñ hai ek ghar miTTī kā hai

ḳhūb-sūrat to bahut hai haañ magar miTTī kā hai

saaf aur shaffāf shīshe kī tarah terā badan

aur mere saath terā ye safar miTTī kā hai

jism meñ aur qabr meñ kis darja hai yaksāniyat

ye bhī ghar miTTī kā hai aur vo bhī ghar miTTī kā hai

'āriz-o-gesū lab-o-ruḳhsār ye sab naam haiñ

maiñ to bas itnā kahūñgā ki bashar miTTī kā hai

chhoTī chhoTī baat par kitnā bikhar jaatā huuñ maiñ

mere jism-o-zāt par puurā asar miTTī kā hai

kūza-gar kuuza banā kar laakh itrā.e magar

maiñ samajhtā huuñ ki 'sūfī' ye hunar miTTī kā hai

jism kya hai kuchh nahin hai ek ghar miTTi ka hai

KHub-surat to bahut hai han magar miTTi ka hai

saf aur shaffaf shishe ki tarah tera badan

aur mere sath tera ye safar miTTi ka hai

jism mein aur qabr mein kis darja hai yaksaniyat

ye bhi ghar miTTi ka hai aur wo bhi ghar miTTi ka hai

'ariz-o-gesu lab-o-ruKHsar ye sab nam hain

main to bas itna kahunga ki bashar miTTi ka hai

chhoTi chhoTi baat par kitna bikhar jata hun main

mere jism-o-zat par pura asar miTTi ka hai

kuza-gar kuza bana kar lakh itrae magar

main samajhta hun ki 'sufi' ye hunar miTTi ka hai