jitna kashish ka jadu tha sara KHala ka tha

jitnā kashish kā jaadū thā saarā ḳhalā kā thā

āñkheñ nahīñ thiiñ pahlā kināra ḳhalā kā thā

duniyā ko us kī apnī kasāfat Dubo ga.ī

maiñ bach gayā ki mujh ko sahārā ḳhalā kā thā

luġhvī nahīñ murādī matālib pe ġhaur kar

dil dil nahīñ thā ek ishārā ḳhalā kā thā

lākhoñ tarah ke ma.anī the ḳhālī saleT ke

har shai se dil-fareb nazārā ḳhalā kā thā

tai thā hamāre dil kī imārat kā TūTnā

īñTeñ zamīn kī thiiñ to gaarā ḳhalā kā thā

duniyā ke sab charāġh lage the qatār meñ

rasta dikhāne vaalā sitāra ḳhalā kā thā

aañsū gire to dil ko tasallī sī ho ga.ī

sayyāre ḳhush the kyūñki ḳhasārā ḳhalā kā thā

nām-o-nasab kī duniyā meñ kuchh ahmiyat nahīñ

varna to maiñ bhī rāj-dulārā ḳhalā kā thā

ThanDak se jamne vaalī sadā.eñ zamīñ kī thiiñ

ġhusse se khaultā huā paarā ḳhalā kā thā

'hamza' jagah ke saare mabāhis fuzūl haiñ

jhagḌā hī jab hamārā tumhārā ḳhalā kā thā

jitna kashish ka jadu tha sara KHala ka tha

aankhen nahin thin pahla kinara KHala ka tha

duniya ko us ki apni kasafat Dubo gai

main bach gaya ki mujh ko sahaara KHala ka tha

lughwi nahin muradi matalib pe ghaur kar

dil dil nahin tha ek ishaara KHala ka tha

lakhon tarah ke mani the KHali saleT ke

har shai se dil-fareb nazara KHala ka tha

tai tha hamare dil ki imarat ka TuTna

inTen zamin ki thin to gara KHala ka tha

duniya ke sab charagh lage the qatar mein

rasta dikhane wala sitara KHala ka tha

aansu gire to dil ko tasalli si ho gai

sayyare KHush the kyunki KHasara KHala ka tha

nam-o-nasab ki duniya mein kuchh ahmiyat nahin

warna to main bhi raj-dulara KHala ka tha

ThanDak se jamne wali sadaen zamin ki thin

ghusse se khaulta hua para KHala ka tha

'hamza' jagah ke sare mabahis fuzul hain

jhagDa hi jab hamara tumhaara KHala ka tha