jitne bhi suraj ke neze the nukile ho gae

jitne bhī sūraj ke neze the nukīle ho ga.e

zindagī kī shāḳh ke sab phuul piile ho ga.e

ham ne hoñToñ par sajā.e jab mohabbat ke gulāb

ḳhuun ke pyāse hamāre hī qabīle ho ga.e

vaqt ne shāḳhoñ se apnī kar diyā un ko alag

sabz patte peḌ ke jis vaqt piile ho ga.e

qabr kī tārīkiyāñ kuchh baḌh ga.iiñ to kyā huā

merī beTī ke to suune haath piile ho ga.e

kaun jaane chal paḌī hai baaġh meñ kaisī havā

vaqt se pahle hī saare phal rasīle ho ga.e

āñdhiyāñ hasrat se apnā sar paTaktī rah ga.iiñ

bach ga.e vo peḌ 'sābir' jo lachīle ho ga.e

jitne bhi suraj ke neze the nukile ho gae

zindagi ki shaKH ke sab phul pile ho gae

hum ne honTon par sajae jab mohabbat ke gulab

KHun ke pyase hamare hi qabile ho gae

waqt ne shaKHon se apni kar diya un ko alag

sabz patte peD ke jis waqt pile ho gae

qabr ki tarikiyan kuchh baDh gain to kya hua

meri beTi ke to sune hath pile ho gae

kaun jaane chal paDi hai bagh mein kaisi hawa

waqt se pahle hi sare phal rasile ho gae

aandhiyan hasrat se apna sar paTakti rah gain

bach gae wo peD 'sabir' jo lachile ho gae