jiye ja raha hun tujhe yaad kar ke

jiye jā rahā huuñ tujhe yaad kar ke

tasavvur kī duniyā ko ābād kar ke

pashemāñ haiñ ham arz-e-rūdād kar ke

karam hī kiyā tum ne be-dād kar ke

mujhe is kī mutlaq shikāyat nahīñ hai

sitam par sitam laao ījād kar ke

kahāñ rahiye apnoñ se kar ke kinārā

milā kyā hai ġhairoñ se fariyād kar ke

hameñ vāsta aise sayyād se hai

ki jo said rakhtā hai āzād kar ke

burā kar rahe haiñ tirā naam le kar

ḳhatā kar rahe haiñ tujhe yaad kar ke

mohabbat sī shai us ne mujh ko atā kī

ki ḳhush ḳhush chalūñ umr barbād kar ke

jo chāho shumār apnā ahl-e-suḳhan meñ

paḌho sher 'rahbar' ko ustād kar ke

jiye ja raha hun tujhe yaad kar ke

tasawwur ki duniya ko aabaad kar ke

pasheman hain hum arz-e-rudad kar ke

karam hi kiya tum ne be-dad kar ke

mujhe is ki mutlaq shikayat nahin hai

sitam par sitam lao ijad kar ke

kahan rahiye apnon se kar ke kinara

mila kya hai ghairon se fariyaad kar ke

hamein wasta aise sayyaad se hai

ki jo said rakhta hai aazad kar ke

bura kar rahe hain tera nam le kar

KHata kar rahe hain tujhe yaad kar ke

mohabbat si shai us ne mujh ko ata ki

ki KHush KHush chalun umr barbaad kar ke

jo chaho shumar apna ahl-e-suKHan mein

paDho sher 'rahbar' ko ustad kar ke