jo aasman mein ghir aae hain dafatan baadal

jo āsmāñ meñ ghir aa.e haiñ daf'atan bādal

ye merī zaat hī chhā.ī huī hai ban bādal

zamīn-e-jism ke haq meñ baras bhī saktā hai

abhī to zabt kī zad meñ hai ye badan-bādal

na haath is meñ kahīñ 'qais' kā nikal aa.e

huā hai sahrā se kyūñkar jilā-vatan bādal

ye kyā huā tirī rangat badaltī jaatī hai

utartā jaatā hai tujh par to shoḳh-pan bādal

idhar havā ne sanan-san kā raag chheḌ diyā

to jhuum uThā hai udhar kar ke ghan-ghanan bādal

jab apne aap ko had se ziyāda paatā hai

to riit jaatā hai 'tarkash' takallufan bādal

jo aasman mein ghir aae hain daf'atan baadal

ye meri zat hi chhai hui hai ban baadal

zamin-e-jism ke haq mein baras bhi sakta hai

abhi to zabt ki zad mein hai ye badan-baadal

na hath is mein kahin 'qais' ka nikal aae

hua hai sahra se kyunkar jila-watan baadal

ye kya hua teri rangat badalti jati hai

utarta jata hai tujh par to shoKH-pan baadal

idhar hawa ne sanan-san ka rag chheD diya

to jhum uTha hai udhar kar ke ghan-ghanan baadal

jab apne aap ko had se ziyaada pata hai

to rit jata hai 'tarkash' takallufan baadal