jo aasman pe ghaTa chha gai to kya hoga

jo āsmāñ pe ghaTā chhā ga.ī to kyā hogā

yakāyak aap kī yaad aa ga.ī to kyā hogā

abhī to dil hai ġham-e-āshiqī se begāna

nazar nazar se jo Takrā ga.ī to kyā hogā

rahe jo hosh bhī qaa.em na vaqt-e-nazzāra

nigāh-e-shauq bhī ghabrā ga.ī to kyā hogā

muhāl jur.at-e-iz.hār-e-mudda.ā na sahī

jo us jabīñ pe shikan aa ga.ī to kyā hogā

kahāñ rahegā guloñ kā ye nāz-e-nik.hat-o-rañg

ḳhizāñ bahār se Takrā ga.ī to kyā hogā

agarche dil meñ liye hoñ hazār-hā shikve

nigāh-e-yār jo sharmā ga.ī to kyā hogā

malā.ika na kareñ naaz apne sajdoñ par

mirī jabīñ ye sharaf pā ga.ī to kyā hogā

chalā huuñ apne muqaddar ke pech suljhāne

vo zulf aur bhī bal khā ga.ī to kyā hogā

vo baat raaz kī pinhāñ jo dil meñ hai 'nudrat'

darūn-e-sher agar aa ga.ī to kyā hogā

jo aasman pe ghaTa chha gai to kya hoga

yakayak aap ki yaad aa gai to kya hoga

abhi to dil hai gham-e-ashiqi se begana

nazar nazar se jo Takra gai to kya hoga

rahe jo hosh bhi qaem na waqt-e-nazzara

nigah-e-shauq bhi ghabra gai to kya hoga

muhaal jurat-e-izhaar-e-muddaa na sahi

jo us jabin pe shikan aa gai to kya hoga

kahan rahega gulon ka ye naz-e-nikhat-o-rang

KHizan bahaar se Takra gai to kya hoga

agarche dil mein liye hon hazar-ha shikwe

nigah-e-yar jo sharma gai to kya hoga

malaika na karen naz apne sajdon par

meri jabin ye sharaf pa gai to kya hoga

chala hun apne muqaddar ke pech suljhane

wo zulf aur bhi bal kha gai to kya hoga

wo baat raaz ki pinhan jo dil mein hai 'nudrat'

darun-e-sher agar aa gai to kya hoga