jo ada dil-kusha nahin hoti

jo adā dil-kushā nahīñ hotī

kuchh bhī ho vo adā nahīñ hotī

ye hai apnī pasand par mauqūf

jaan sab par fidā nahīñ hotī

vo kalī ḳhaar se bhī bad-tar hai

jis meñ bū-e-vafā nahīñ hotī

husn ke dil pe ho asar jis kā

aisī koī duā nahīñ hotī

vo sazā de rahe haiñ ye kah kar

kyā mohabbat ḳhatā nahīñ hotī

jo mile husn kī adālat se

dar-haqīqat sazā nahīñ hotī

un se kah do ki be-naqāb na hoñ

har nazar pārsā nahīñ hotī

ye mohabbat hai us ke parde meñ

zulm kī intihā nahīñ hotī

aap kahte haiñ nā-ravā to kaheñ

arz-e-ġham nā-ravā nahīñ hotī

jo ada dil-kusha nahin hoti

kuchh bhi ho wo ada nahin hoti

ye hai apni pasand par mauquf

jaan sab par fida nahin hoti

wo kali KHar se bhi bad-tar hai

jis mein bu-e-wafa nahin hoti

husn ke dil pe ho asar jis ka

aisi koi dua nahin hoti

wo saza de rahe hain ye kah kar

kya mohabbat KHata nahin hoti

jo mile husn ki adalat se

dar-haqiqat saza nahin hoti

un se kah do ki be-naqab na hon

har nazar parsa nahin hoti

ye mohabbat hai us ke parde mein

zulm ki intiha nahin hoti

aap kahte hain na-rawa to kahen

arz-e-gham na-rawa nahin hoti