jo apni chashm-e-tar se dil ka para chhoD jata hai

jo apnī chashm-e-tar se dil kā paara chhoḌ jaatā hai

vahī mahfil meñ ġham kā isti'āra chhoḌ jaatā hai

miyāñ ġhurbat meñ har ik be-sahārā chhoḌ jaatā hai

añdherā ho to saaya bhī hamārā chhoḌ jaatā hai

jidhar jalve bikharte haiñ udhar kartā nahīñ nazreñ

shikast-e-ḳhvāb ke Dar se nazāra chhoḌ jaatā hai

mujhe sairāb kartā jā agar tū ik samundar hai

faqat pyāse pe kyuuñ ilzām saarā chhoḌ jaatā hai

har ik hai mahv-e-hairat vo karishma-sāz hai aisā

sar-e-mahfil jo ik rangīñ nazāra chhoḌ jaatā hai

maiñ aksar kashtī-e-mauj-e-balā par sair kartā huuñ

mujhe sāhil pe us kā ik ishāra chhoḌ jaatā hai

'ajab hai merā mohsin bhī ki jaate vaqt vo aksar

mirī palkoñ pe ik raushan sitāra chhoḌ jaatā hai

jo apni chashm-e-tar se dil ka para chhoD jata hai

wahi mahfil mein gham ka isti'ara chhoD jata hai

miyan ghurbat mein har ek be-sahaara chhoD jata hai

andhera ho to saya bhi hamara chhoD jata hai

jidhar jalwe bikharte hain udhar karta nahin nazren

shikast-e-KHwab ke Dar se nazara chhoD jata hai

mujhe sairab karta ja agar tu ek samundar hai

faqat pyase pe kyun ilzam sara chhoD jata hai

har ek hai mahw-e-hairat wo karishma-saz hai aisa

sar-e-mahfil jo ek rangin nazara chhoD jata hai

main aksar kashti-e-mauj-e-bala par sair karta hun

mujhe sahil pe us ka ek ishaara chhoD jata hai

'ajab hai mera mohsin bhi ki jate waqt wo aksar

meri palkon pe ek raushan sitara chhoD jata hai