jo bhi hai ranj-o-gham KHatm ho jaega

jo bhī hai ranj-o-ġham ḳhatm ho jā.egā

us se karvāo dam ḳhatm ho jā.egā

ḳhud meñ itnī ziyāda havā mat bharo

saañs kā zer-o-bam ḳhatm ho jā.egā

ḳhvāb kī fasl hī gar jalā dī ga.ī

to ilāqe se nam ḳhatm ho jā.egā

ek āvāz aa.egī bas aur phir

silsila ek dam ḳhatm ho jā.egā

mere ġham se zarā vāqafiyyat baḌhā

dekhnā terā ġham ḳhatm ho jā.egā

apnī mushkil batātā nahīñ maiñ use

merā saarā bharam ḳhatm ho jā.egā

apne hone kī itnī dalīleñ na de

tū ḳhudā kī qasam ḳhatm ho jā.egā

kyā muqaddar meñ chhoTī sī tarmīm se

bām-e-lauh-o-qalam ḳhatm ho jā.egā

mere naqsh-e-qadam par na chalnā 'azīz'

merā naqsh-e-qadam ḳhatm ho jā.egā

jo bhi hai ranj-o-gham KHatm ho jaega

us se karwao dam KHatm ho jaega

KHud mein itni ziyaada hawa mat bharo

sans ka zer-o-bam KHatm ho jaega

KHwab ki fasl hi gar jala di gai

to ilaqe se nam KHatm ho jaega

ek aawaz aaegi bas aur phir

silsila ek dam KHatm ho jaega

mere gham se zara waqafiyyat baDha

dekhna tera gham KHatm ho jaega

apni mushkil batata nahin main use

mera sara bharam KHatm ho jaega

apne hone ki itni dalilen na de

tu KHuda ki qasam KHatm ho jaega

kya muqaddar mein chhoTi si tarmim se

baam-e-lauh-o-qalam KHatm ho jaega

mere naqsh-e-qadam par na chalna 'aziz'

mera naqsh-e-qadam KHatm ho jaega