jo bhi haq par ho wahi dar-o-rasan tak pahunche

jo bhī haq par ho vahī dār-o-rasan tak pahuñche

aadmī aaj kā yuuñ rasm-e-kohan tak pahuñche

baat ho gul kī jahāñ us ke laboñ tak aa.e

zikr jab sarv kā ho us ke badan tak pahuñche

maiñ ne Thānī hai hifāzat maiñ karūñgī us kī

ho jo himmat to ḳhizāñ mere chaman tak pahuñche

ye badan Dhaal banā lūñgī havā ke aage

garm jhoñkā jo koī mere vatan tak pahuñche

aur bhī hoñge yahāñ laakh suḳhan-var lekin

koī to ho jo mirī tarz-e-suḳhan tak pahuñche

jo bhi haq par ho wahi dar-o-rasan tak pahunche

aadmi aaj ka yun rasm-e-kohan tak pahunche

baat ho gul ki jahan us ke labon tak aae

zikr jab sarw ka ho us ke badan tak pahunche

main ne Thani hai hifazat main karungi us ki

ho jo himmat to KHizan mere chaman tak pahunche

ye badan Dhaal bana lungi hawa ke aage

garm jhonka jo koi mere watan tak pahunche

aur bhi honge yahan lakh suKHan-war lekin

koi to ho jo meri tarz-e-suKHan tak pahunche