jo bhi kahna tha wo an-kaha rah gaya

jo bhī kahnā thā vo an-kahā rah gayā

dil kā armān dil meñ dabā rah gayā

umr bhar us kī jānib maiñ chaltī rahī

phir bhī mīloñ kā ye fāsla rah gayā

yuuñ to duniyā meñ sab kuchh hai mujh ko milā

sirf tū hī to mujh se judā rah gayā

apnī kahtā rahā merī ik nā sunī

vo ḳhafā thā ḳhafā kā ḳhafā rah gayā

aa gayā lauT kar vo mire paas hī

mujh meñ phir bhī kahīñ ik ḳhalā rah gayā

kyā batā.ūñ tumheñ apnī taqdīr se

kyā milā hai mujhe aur kyā rah gayā

DhūñDte DhūñDte maiñ kahīñ kho ga.ī

vo bhī mere liye lāpata rah gayā

manzileñ mil ga.iiñ jaane kis ko 'hinā'

apnī qismat meñ bas rāsta rah gayā

jo bhi kahna tha wo an-kaha rah gaya

dil ka arman dil mein daba rah gaya

umr bhar us ki jaanib main chalti rahi

phir bhi milon ka ye fasla rah gaya

yun to duniya mein sab kuchh hai mujh ko mila

sirf tu hi to mujh se juda rah gaya

apni kahta raha meri ek na suni

wo KHafa tha KHafa ka KHafa rah gaya

aa gaya lauT kar wo mere pas hi

mujh mein phir bhi kahin ek KHala rah gaya

kya bataun tumhein apni taqdir se

kya mila hai mujhe aur kya rah gaya

DhunDte DhunDte main kahin kho gai

wo bhi mere liye lapata rah gaya

manzilen mil gain jaane kis ko 'hina'

apni qismat mein bas rasta rah gaya