jo bhi mil jata hai ghar-bar ko de deta hun

jo bhī mil jaatā hai ghar-bār ko de detā huuñ

yā kisī aur talabgār ko de detā huuñ

dhuup ko detā huuñ tan apnā jhulasne ke liye

aur saaya kisī dīvār ko de detā huuñ

jo duā apne liye māñgnī hotī hai mujhe

vo duā bhī kisī ġham-ḳhvār ko de detā huuñ

mutma.in ab bhī agar koī nahīñ hai na sahī

haq to maiñ pahle hī haqdār ko de detā huuñ

jab bhī likhtā huuñ maiñ afsānā yahī hotā hai

apnā sab kuchh kisī kirdār ko de detā huuñ

ḳhud ko kar detā huuñ kāġhaz ke havāle aksar

apnā chehra kabhī aḳhbār ko de detā huuñ

merī dūkān kī chīzeñ nahīñ biktī 'nazmī'

itnī tafsīl ḳharīdār ko de detā huuñ

jo bhi mil jata hai ghar-bar ko de deta hun

ya kisi aur talabgar ko de deta hun

dhup ko deta hun tan apna jhulasne ke liye

aur saya kisi diwar ko de deta hun

jo dua apne liye mangni hoti hai mujhe

wo dua bhi kisi gham-KHwar ko de deta hun

mutmain ab bhi agar koi nahin hai na sahi

haq to main pahle hi haqdar ko de deta hun

jab bhi likhta hun main afsana yahi hota hai

apna sab kuchh kisi kirdar ko de deta hun

KHud ko kar deta hun kaghaz ke hawale aksar

apna chehra kabhi aKHbar ko de deta hun

meri dukan ki chizen nahin bikti 'nazmi'

itni tafsil KHaridar ko de deta hun